《僕だけがいない街》感想【粵】

故事過程有趣而且有意思﹐係今期睇完第一話之後期待值最高嘅作品﹐亦係今期我評價之中最高嘅作品｡

LOOP並唔係咩新鮮題材﹐亦唔係容易發揮嘅題材﹐而呢部作品發揮得好好﹐而且冇陳舊嘅感覺｡LOOP作品只要發揮得好其實好容易名列我評價中嘅前矛﹐我人生頭3係LOOP﹐計頭60套就有5套係LOOP﹐幾乎至今留有印象嘅LOOP題材作都係我最熱愛嘅作品﹐而呢套作品將會成為第6套｡

講到LOOP嘅手法技巧其實寫到好多嘢﹐所以就唔寫喇﹐講返故事｡ 簡單啲黎講就係男主角要改變過去﹐從而跳去一個最好嘅世界線｡ 手法同其他作品唔同﹐唔可以直接比較﹐但係作品目標係好清晰﹐同時又一直隱藏呢個目標﹐因為觀眾係唔知最後係乜嘢ending｡

觀眾以男主角視點出發﹐理所當然就係跟住男主角方向走﹐首先男主角只係逃離現場﹐之後目標轉向拯救加代﹐跟住就係拯救埋其他受害者﹐而令兇手就擒其實係知道兇手之後先真正變成目標｡ 作品由伏線到解釋都做得相當完滿﹐人物架構亦砌得好好﹐不論係過去嘅人物: 加代、美里、悟嘅同伴、加代嘅母親﹐定現代嘅人物: 愛梨、店長、記者﹐全部都帶動到成個故事進行｡

唔討論呢個作品係咪屬於推理懸疑作品﹐但係"兇手必然係早期出場嘅人物"呢點毫無疑問係令呢部作品值得評價嘅重點之一｡ 不過正係正在於的確一開始就已經覺得個老師好"鬼"﹐但係佢又畀到一個"太鬼反而唔係"嘅印象出黎﹐加上一啲misleading﹐令人對佢有戒心之餘又冇十足把握﹐明明呢套作品根本冇第二個人物滿足到"兇手"嘅條件(除非一直冇出場)｡ Misleading令我諗過會唔會現代嘅兇手同過去嘅兇手其實唔係同一個人﹐而係繼承者﹐好似二十面相嗰啲咁｡ 又懷疑過現代嘅兇手會唔會係ケンヤ﹐亦令我諗過一啲一套好嘅懸疑作品唔應該出現嘅可能性﹐例如人格分裂﹐而開估結果係令我相當滿意｡

系列構成同腳本令幾乎每一話嘅結尾都好吊癮﹐而細節有唔少地方係深印象｡

加代受虐待嘅演技﹐即使係深知悠木碧嘅演技早已經爐火純青﹐面對呢個演技都依然係好驚嘆｡

加代作文所寫嘅"私だけがいない街"﹐睇完篇咁嘅作文好難唔心痛、唔想做啲嘢｡
その島で、私は私だけがいなくなった街のことを考える。子供はいつものように、学校に行く。大人はいつものように、会社に行く。 お母さんはいつものように、ご飯を食べる。私は、私だけがいない街のことを考えると、気持ちが軽くなる。遠く、遠くへ行きたい。
呢篇文呼應緊呢套作品嘅名﹐首先畀觀眾對作品名產生一個悲觀感﹐先整個谷底﹐之後上山頂自然會更滿足﹐呢個係一個好好嘅鋪排｡

愛梨嘅格言﹐一個細路女講嘢會咁有信念﹐真係好深印象｡
「言葉」ってさ、口に出して言ってるうちに本当になる気がする（講咗出口嘅說話感覺就會成真）
「信じられる」からじゃないんだ。「信じたい」の。（唔係因為值得相信, 而係因為心裡相信）
『信じてもらえない』事って、すごく怖い事だと思う。愛梨の「信じたい」は自分の為だよ。誰かに「信じて欲しい」の裏返しなんだよ。
而愛梨嘅過去﹐好令人同情﹐愛梨因為過去嘅事而變得好願意去相信人﹐反過黎為咗唔想佢因為咁而受傷害﹐令人想喺佢身邊保護佢｡

八代因為悟知道佢嘅未來﹐而令佢受到精神束縛﹐八代走入咗"自己做緊嘅嘢究竟係咪會造就未來真正嘅自己"呢個思維旋渦之中﹐呢個描寫真係好正｡ 除咗呢啲重點﹐悟母親嘅"怪物能力"同埋24孝母親嘅行動亦令人留低好深印象｡

去到最後﹐悟憑心計同埋同伴嘅協助而令故事走向最完美嘅局面﹐係一個令人痛快舒暢嘅結局｡ 劇中最尾解開作品標題嘅意思﹐"僕だけがいない街"係講緊悟"消失"於街上嘅一段寶貴時光﹐因為自已嘅"不存在"而換到嘅寶物｡

相當有意思｡

橫觀整部動畫作品﹐除咗波濤洶湧嘅發展﹐仲帶出咗人性醜陋一面﹐亦警剔人過去有虐兒、虐待之間產生咗連鎖嘅社會問題﹐係一部好有心思嘅作品｡

2016.4.9