《昭和元禄落語心中》感想【粵】

呢套係一套幾揀觀眾嘅作品﹐不過只要睇完第一話係感興趣﹐睇到最後絕對係唔會失望｡

第一話係80年代末﹐第二話就將舞台轉到過去﹐由二戰前做到二戰後｡ 作品對落語嘅描寫係相當有文化價值﹐就算係為咗認識日本文化﹐呢部作品亦係個好推介｡

喺落語嘅演技上﹐関智一同石田彰嘅演繹可以話令人嘆為觀止﹐雖然我唔敢講佢哋能唔能夠同現實中嘅落語水平去比較﹐但係從佢哋嘅演繹中可以感受到佢哋嘅努力﹐發揮得相當出色｡

八雲、助六、みよ吉﹐作品對佢哋嘅描寫非常人性﹐從佢哋言行同表情可以睇得出佢哋內心諗乜﹐各種自我矛盾、內心糾結、情感變化都刻劃到出黎｡

みよ吉呢個角色真係叫人又愛又恨﹐事實上人就係咁嘅生物﹐雖然唔係個個人都好似佢咁自我中心﹐不過呢個人物充分表現出一個處心積慮嘅人內心會係幾咁單純愚昧｡ 助六為人散漫﹐目光卻係好遠大﹐但係又疏於計劃﹐有願景冇思考﹐而且一旦放棄﹐就完全失去自我｡ 八雲係個自卑嘅人﹐既妒忌又敬佩助六嘅才華﹐既煩厭又依賴助六嘅存在﹐不過講到底兩樣都係後者比較重﹐助六對佢黎講始終係唔可以嘅戰友、家人｡ 呢啲對人物嘅寫實描寫係呢套作品一大誘人之處｡

而故事亦都一直好流暢嘅做落去﹐去到みよ吉搵助六私奔﹐助六臨走前嘅演出等等﹐都做得好好睇｡ 助六最後一次嘅落語﹐完全係描述緊自己嘅悔意﹐雖然八雲都話係得佢先會將呢個故事做得咁歡趣﹐但係知音人就好難唔感動﹐可惜みよ吉走咗...

悲劇嘅結局﹐雖然預咗都依然非常傷感｡ 整部作品不論係文化角度定娛樂角度睇都令人好滿足﹐絕對值得一睇｡

2016.4.7